Hongera
Majjid Mjengwa,
Wiki
hii inayomalizika mdau mwenzetu katika tasnia ya habari, mchambuzi mkongwe,
mwandishi kindakindaki, mfuatiliaji na mdadavuaji wa habari na matukio na
mengine mengi Majjid Mjengwa ameweka sokoni kitabu chake kinachomuelezea gwiji
wa mapambano dhidi ya ubaguzi wa rangi na mpigania ukombozi wa Taifa la Afrika
ya Kusini, Hayati Mzee Nelson Rolihlahla Mandela.
Mjengwa
ameandika kitabu hiki wakati muafaka na amewatendea haki wanajamii hasa wale
ambao ama kwa sababu za umri, zama, ama kwa sababu ya kukosa fursa ama kwa
sababu nyingine hawakupata kujua kuhusu mwanasiasa huyo Mkongwe alivyojitolea
maisha yake kuipigania Afrika ya Kusini iliyokua imetumbukia katika janga la
ubaguzi wa rangi ulioendeshwa na makaburu.
Ni
sawa Mjengwa ameandika mengi yenye manufaa kwa jamii na ndivyo alivyo kwa
tunayefuatilia maisha yake ya uandishi.
Lakini
mimi nimeona katika Blog hii Nimpongeze Ndugu Mjengwa kwa sababu alichokifanya
ni wajibu wa kila mtu aliyehifadhi historia, taaluma na fursa ya kukiunganisha
kizazi cha sasa na yale yaliyojiri kabla
yake.
Katikati
ya mwaka 2013 nilihudhuria kongamonano moja lililomwalika Askofu Mstaafu
Norbert Mtega katika Jubilei ya kumpongeza Padre Christian Mhagama mmoja wa
waandishi wazuri wa vitabu, Askofu Mtega katika Siku hii alisema “Msomi
asiyeandika vitabu ni sawa na Mama mjamzito asiyezaa”
Kwa
maana hii Mjengwa na waandishi wengine wa vitabu wanatimiza wajibu wao, na wale
wasiofanya hivyo wakati wana taaluma ya kufanya hivyo hawatimizi wajibu wao.
Japo
kuwa sijapata nakala ya kitabu cha simulizi za Mzee Mandela cha Mjengwa, mimi
ni mmoja wa wasomaji wa Blog ya Mjengwa kila uchao na nimefuatilia maandalizi
yake kwa kuwa alikua akiweka kwenye Blog yake kila anapofanya tafsiri ya kile
kitabu cha Mzee Madiba cha safari ya Ukombozi yaani “Long work to Freedom” Kwa
kweli nikiri kuwa hata mimi sijakisoma kitabu hicho cha Madiba na hivyo
nilivutiwa mno na simulizi iliyokua ikitafsiriwa na Mjengwa kwenye Blog yake.
Kuna
mengi ya kuyasema lakini katika pongezi nimalizie kwa kusema Hongera sana
Mjengwa na hongera kwa kuona umuhimu wa kuchapisha kitabu ili iwe kumbukumbu
sahihi kwa kila anayetaka kusoma Simulizi za Mzee Mandela na endelea kufanya
hivyo kwa mambo mengine mengi yaliyo hazina kwenye kichwa chako kama ilivyo
kwaida yako.
Wadau
sisi vipi?
Nauliza
swali hili kwa sababu naamini kuwa wengi wanaweza kufanya kama alivyofanya
Majjid Mjengwa katika simulizi za Mzee Madiba. Hasa kwa sisi waandishi wa
habari na katika hili nawagusa zaidi waandishi wa habari wakongwe ambao mimi
naamini wana mambo mengi mazuri ya kukisimulia kizazi hiki cha leo hapa
Tanzania kuliko watu wengine.
Ndio,
wanahabari tunayo fursa hii kwa sababu tunaona mengi. Najiuliza hapa Tanzania
Mwalimu Nyerere amefanya mengi katika kupigania uhuru, kuijenga Tanganyika,
kuiunganisha Tanganyika na Zanzibar na mengine mengi. Yapo yaliyokua kama
vitimbwi, yapo yaliyoonesha uthubutu wa hali ya juu, yapo yaliyoonesha
kujitolea hata kufa, yapo yaliyoonesha ujasiri ambao unaonekana leo kama vitu
visivyowezekana na mengine kibao.
Haya
yote yalifanyika mbele ya waandishi wa habari. Jamani tupeni utamu, tupeni
historia, achieni kalamu zenu zitembee, msiache uhondo huo uteketee, msisubiri
waje wazungu watafiti ndio waandike.
Akina
Mzee Abdul Ngalawa, Ahamed Kipozi, Jenerali Ulimwengu, Phili Karashani, Ernest
Mrutu, Agustino Mbunda, Ben Kiko, Hamza Kasongo, Mhidin Michuzi na wengine wengi tupeni uhondo.
Si
lazima kutafsiri vitabu lakini zipo simulizi kuhusu yale mliyoyaona wakati huo,
jinsi nchi ilivyoendeshwa, jinsi mabadiliko yalivyokuja na mengine mengi.
Sisemi
kwamba hamjafanya kabisa hapana, najua baadhi huandaa vipindi, huandika makala
na kufanya mahojiano lakini isiishie hapo, tuandikieni vitabu, vitangazeni ili
watanzania wavinunue na waijue nchi yao ilikotoka. Jenerali Ulimwengu
nakupongeza pia kwa kuwa umetekeleza hili.
Nasema
hivi kwa sababu naamini kuwa, baadhi ya matatizo yanayotukumba sasa Tanzania
yanaweza kutatuliwa kwa nguvu ndogo tu ya sisi wanahabari kutumia kalamu zetu
kuwapata taarifa watanzania, kuwakumbusha watanzania na kuwaonesha njia ya
kupita.
Leo
hii inashangaza kumuona mtanzania akitoa kipaumbele kwa mambo ambayo yanaibomoa
nchi, yanavuruga moyo wa kuijenga nchi kwa kujitolea, yanajenga chuki,
yanaruhusu wabaya kuivuruga nchi. Tulikotoka haikua hivyo, na nchi za wenzetu
kama vile China bado wanafanya yale ambayo sie tulikua tunayafanya kabla ya
miaka ya 90.
Najua
aya hiyo hapo juu itakua imewachefua baadhi ya watu, lakini niseme sababu hizo
zinazotumiwa na baadhi yetu kuhalalisha mambo yanayoigharimu nchi utatuzi wake
unapaswa kutenganishwa na jukumu la msingi la kujenga Taifa letu.
Kama
kuna wezi, mafisadi ama walafi tuwaache washughulikiwe na vyombo husika. Wasiohusika
tukazane kujenga nchi, haiwezekani sote tukawa walalamikaji, sote tunatafuta
wala rushwa na wezi na mwisho wa siku sote tukawa wanasiasa. Nchi atajenga nani?
Jamani
eheee wakongwe wa Habari andikeni vitabu watanzania wasome enzi za mwalimu
watanzania waliishi vipi?
Na
je wala rushwa hawakuwepo?
Mafisadi
hawakuwepo?
Viongozi
legelege hawakuwepo?
Siasa
hazikuwepo?
Waaminisheni
watanzania kuwa kila mtu anaweza kuwa mpigania nchi yake na akawa shujaa, kama
ambavyo Mjengwa amemuandika Mzee Madiba na simulizi nyingi nyingi alizowahi
kuandika.
Mwisho
nawapenda sana na niliyoandika sio msahafu.
