Hizo ndio dawa zenyewe
Na Rashid Nchimbi wa Jeshi la Polisi Arusha
Mapambano
dhidi ya uzuiaji wa madawa ya kulevya mkoani Arusha yanazidi “kupamba
moto” baada ya jeshi la Polisi Mkoani hapa kukamata gari lililokuwa na
magunia sita ya bangi. Tukio hilo lilitokea mwishoni mwa mwezi wa April
muda wa saa 6:00 Mchana wilayani Longido.
Akizungumza
na waandishi wa habari ofisini kwake, Kamanda wa Polisi Mkoa wa Arusha
Kamishna Msaidizi wa Polisi (ACP) Liberatus Sabas alisema tukio hilo
lilifanikiwa baada ya askari wa jeshi hilo kupata taarifa toka kwa raia
wema juu ya kuwepo kwa tukio la kusafirisha madawa hayo toka Longido
Mjini kuelekea Namanga.
Alisema
askari walipopata taarifa hiyo walianza kulifualia gari hilo aina ya
Toyota Hiace lenye namba za usajili T. 526 BWX na mara baada ya dereva
wa gari hilo kugundua anafuatiliwa aliamua kulitelekeza na kisha
kukimbia.
“Mara
baada ya askari kulifikia gari hilo walilipekua na kukuta gunia sita za
madawa ya kulevya aina ya bangi zikiwa nyuma ya siti na mpaka hivi sasa
mmiliki wa gari hilo bado hajajulikana na tunafanya juhudi za
kumtafuta”. Alisema Kamanda Sabas.
Aidha
kwa upande mwingine Kamanda Sabas aliendelea kuwashukuru baadhi ya
wananchi wa Mkoa huu kutokana na ushirikiano mzuri juu ya utoaji wa
taarifa za uhalifu na wahalifu kwa jeshi hilo hali ambayo inasaidia
kuzuia vitendo vya uhalifu na kukamatwa kwa wahalifu wa matukio
mbalimbali.
Aliendelea
kuwasihi wakazi wa mkoa huu na mikoa mingine hapa nchini kuendelea
kushirikiana na jeshi hilo katika kupeana taarifa za uhalifu na wahalifu
ili kuweza kuzidi kuimarisha hali ya amani na utulivu.
